ປະຊາຊົນ 372 ຄອບຄົວ ເມືອງນານ ທີ່ຖືກນໍ້າຖ້ວມ ມີຄວາມຕ້ອງການເຄື່ອງອຸປະໂພກ ແລະ ບໍລິໂພກທີ່ຈຳເປັນຫຼາຍຢ່າງ

ໃນຕອນເຊົ້າຂອງວັນທີ່ 30 ກໍລະກົດ, ເວລາປະມານ 7 ໂມງ, ນໍ້າຈາກແມ່ນ້ຳນານ​ ເມືອງນານ​ແຂວງຫລວງພະບາງໄດ້ໄຫລເຂົ້າຖ້ວມບ້ານເຮືອນ ແລະ ພື້ນທີ່ທຳການຜະລິດຂອງປະຊາຊົນ ຕາມລ້ອງແມ່ນ້ຳນານ, ໃນນັ້ນມີ ຜົນກະທົບຫນັກຕໍ່ 8 ບ້ານ 372 ຄອບຄົວ ເຊັ່ນ: ບ້ານນາຝາຍ 4 ຄອບຄົວ, ບ້ານປ່າໄຜ່ 35 ຄອບຄົວ, ບ້ານສີມຸງຄຸນ 35 ຄອບຄົວ, ບ້ານສີບຸນເຮືອງ 130 ຄອບຄົວ, ບ້ານນາເລົາ 120 ຄອບຄົວ, ບ້ານໂພນຫີນ 10 ຄອບຄົວ, ບ້ານນາເຄີນ 37 ຄອບຄົວ ແລະບ້ານທາດ 1 ຄອບຄົວ, ເຊິ່ງປະຊາຊົນບາງຄອບຄົວໄດ້ພຽງເຄື່ອງນຸ່ງຄາຄີງ ແລະ ມີບາງຄົນກໍ່ຍັງຕິດຢູ່ໃນເຮືອນ. ເຫດການໄພພິບັດໃນຄັ້ງນີ້ ໄດ້ສ້າງຄວາມເສຍຫາຍຫລາຍກ່ວາທຸກປີຜ່ານມາ, ເຊິ່ງຫຼາຍຄັ້ງ ແມ່ນມີຄົນເສຍຊີວິດ. ແຕ່ສຳລັບຄັ້ງນີ້ ມີພຽງແຕ່ຜູ້ໄດ້ຮັບບາດເຈັບ ບໍ່ມີຄົນເສຍຊີວິດ; ສ່ວນຂໍ້ມູນຄວາມເສຍຫາຍ ແມ່ນຍັງຢູ່ໃນຂັ້ນຕອນການເກັບກຳ ຂໍ້ ມູນເບື້ອງຕົ້ນຢູ່.

ທາງອົງການປົກຄອງເມືອງນານ ໄດ້ສົ່ງກຳລັງເຈົ້າໜ້າທີ່ທະຫານ-ຕ່ຳຫລວດປະຈຳຢູ່ກອງບັນຊາ ການເມືອງ ເຂົ້າຊ່ວຍເຫລືອປະຊາຊົນທີ່ຕິດຄ້າງຢູ່ໃນເຮືອນ, ພ້ອມທັງຊ່ວຍແກ້ໄຂຜົນກະທົບໃຫ້ບາງຄອບຄົວ ແລະ ຈັດຕັ້ງການປ້ອງກັນເວນຍາມ ເຝົ້າລະວັງຕະຫລອດ 24 ຊົ່ວໂມງ ເນື່ອງຈາກຝົນຍັງສືບຕໍ່ຕົກຢູ່; ສ່ວນລະດັບນ້ຳກໍ່ໄດ້ຫລຸດລົງເກືອບເຂົ້າສູ່ພາວະປົກກະຕິແລ້ວ, ແລະ ຄອບຄົວຂອງປະຊາຊົນທີ່ຖືກຜົນກະທົບກໍ່ໄດ້ຮັບການເບີ່ງແຍງຢ່າງໃກ້ຊິດຕາມລຳດັບຈາກອົງການປົກຄອງເມືອງ.


ປະຈຸບັນ, ປະຊາຊົນຜູ້ມີເງື່ອນໄຂ ໄດ້ກັບເຂົ້າໄປອະນາໄມເຮືອນຊານຂອງຕົນ ກໍ່ໄດ້ສົມທົບກັບເຈົ້າໜ້າທີ່ຕໍ່າຫຼວດ ແລະ ທະຫານເມືອງ ແລະ ທະຫານຈາກກອງພັນ 414, ແລະ ກອງບັນຊາການທະຫານແຂວງ ເຂົ້າຊ່ວຍ, ແຕ່ສີ່ງທີ່ປະຊາຊົນຕ້ອງການເປັນອັນຮີບດ່ວນ ໃນປະຈຸບັນ ແມ່ນ ເຄື່ອງນຸ່ງຮົ່ມ, ສະບຽງອາຫານ ແລະ ນ້ຳກີນ ເພື່ອບັນເທົາໄພເບື້ອງຕົ້ນ, ເຊີ່ງໃນຕອນແລງຂອງວັນທີ່ 30 ກໍລະກົດຜ່ານມາ ກໍ່ໄດ້ຮັບການຊ່ວຍເຫຼືອແລ້ວໃນເບື້ອງຕົ້ນ ຈາກອົງການປົກຄອງແຂວງໄຊຍະບູລີ ເປັນເງີນສົດ 5.000.000 ກີບ ແລະ ອົງການປົກຄອງເມືອງໄຊຍະບູລີ ມອບນ້ຳດື່ມ ແລະ ມີ່ສຳເລັດຮູບ ມູນຄ່າ 2.400.000 ກີບ.

ປະຈຸບັນ, ອົງການປົກຄອງແຂວງຫຼວງພະບາງ ໄດ້ຈັດຕັ້ງຈຸດຮັບເຄື່ອງບໍລິຈາກ ຢູ່ຫ້ອງວ່າການປົກຄອງແຂວງ, ໃນຂະນະທີ່ ຫຼາຍພາກສ່ວນໃນສັງຄົມ ກໍ່ໄດ້ຈັດຕັ້ງກຸ່ມລະດົມການບໍລິຈາກ ເພື່ອນຳເຄື່ອງໄປມອບບັນເທົາທຸກໃຫ້ປະຊາຊົນໃນໄວໆນີ້.

ຂອບໃຈຂໍ້ມູນ: www.sokhaviek.com

 

ລາຍການທີ່ກ່ຽວຂ້ອງ

ວີດີໂອແນະນໍາ