HUAWEI ເປີດໂຕ Huawei Mate X ສະມາດໂຟນ 5G ໜ້າຈໍພັບໄດ້ທີ່ມີຄວາມໄວທີ່ສຸດໃນໂລກ

ເມື່ອວັນທີ 24 ກຸມພາ 2019 ທີ່ຜ່ານມາ, ກຸ່ມທຸລະກິດຜະລິດຕະພັນເພື່ອຜູ້ບໍລິໂພກຂອງບໍລິສັດຫົວເຫວີຍ ໄດ້ເປີດໂຕ Huawei Mate X ສະມາດໂຟນ 5G ໜ້າຈໍພັບໄດ້ມີຄວາມໄວທີ່ສຸດໃນໂລກໃນງານ Mobile World Congress (MWC) ທີ່ບາເຊໂລນາ ປະເທດສະເປນ, ເປັນສະມາດໂຟນທີ່ມີການອອກແບບແບບໃໝ່ສາມາດພັບໜ້າຈໍໄດ້, ສືບຕໍ່ການພັດທະນາມາຈາກລຸ້ນຂອງ Huawei Mate Series.

Huawei Mate X ໃຊ້ຊິບເຊັດ Kirin 980 ໃນການປະມວນຜົນເຮັດວຽກຮ່ວມກັບຊິບເຊັດ Balong 5000 multi-mode ທີ່ມີຂະໜາດນ້ອຍທີ່ສຸດ 7nm, RAM 8GB ແລະ ROM 512GB, ຄວາມຈຸແບັດຕາຣີສູງສຸດ 4500mAh ຮອງຮັບລະບົບສາກໄວທີ່ສຸດໃນໂລກ 55W HUAWEI Super Charge ສາມາດສາກແບັດຕາຣີຄວາມຈຸ 85% ໃນເວລາພຽງ 30ນາທີ.

Huawei Mate X ເປັນສະມາດໂຟນຈໍພັບໄດ້ທີ່ມີຄວາມບາງທີ່ສຸດໃນໂລກ ໃຊ້ກົນໄກການພັບໜ້າຈໍທີ່ມີຊື່ວ່າ Falcon Wing Hinge, ສາມາດໃຊ້ງານໜ້າຈໍໄດ້ເຖິງ 3 ຮູບແບບຄື: ໃນໂໝດໜ້າຈໍພັບທາງຈໍດ້ານໜ້າຈະມີຂະໜາດ 6.6ນິ້ວ ຄວາມລະອຽດ 2480×1148 ພິກເຊວ ອັດຕາສ່ວນໜ້າຈໍ 19:5:9 ແລະ ຈໍດ້ານຫຼັງຂະໜາດ 6.38ນິ້ວ ຄວາມລະອຽດ 2480×892 ພິກເຊວ ອັດຕາສ່ວນໜ້າຈໍ 25:9, ໃນໂໝດທີ່ກາງໜ້າຈໍອອກເພື່ອໃຊ້ງານເປັນແທັບເລັດ Full View ຈະມີໜ້າຈໍທີ່ໃຫຍ່ເຖິງ 8 ນິ້ວ ຄວາມລະອຽດ 2480×2200 ພິກເຊວ ອັດຕາສ່ວນໜ້າຈໍ 25:9, ເມື່ອກາງໜ້າຈໍອອກໂຕເຄື່ອງມີຄວາມໜາພຽງ 5.4mm ແລະ ຕອນພັບໜ້າຈໍລົງໂຕເຄື່ອງຈະມີຄວາມໜາພຽງ 11mm.

ສະມາດໂຟນລຸ້ນນີ້ມາພ້ອມກັບເສົາອາກາດ 5G ຈຳນວນ 4ຊຸດ ໃຫ້ດາວໂຫຼດລິ້ງຄວາມໄວສູງສຸດເຖິງ 4.6Gbps ເຊິ່ງຢູ່ໃນລະດັບທີ່ຕໍ່າກວ່າເຄືອຂ່າຍ 6G ນ້ອຍໜຶ່ງ, ໄວກວ່າ 4G 10 ເທົ່າ ເມື່ອໃຊ້ດາວໂຫຼດໄຟລ໌ໜັງຂະໜາດ 1GB ຈະໃຊ້ເວລາພຽງ 3 ວິນາທີເທົ່ານັ້ນ (ອ້າງອີງລາຍງານຈາກ t3.com)

ສະມາດໂຟນເຮືອທົງຂອງ Huawei ມັກມາພ້ອມກ້ອງຖ່າຍພາບທີ່ຈັດເຕັມສະເໝີ, ເຊັ່ນດຽວກັນກັບ Huawei Mate X ທີ່ໄດ້ຮ່ວມມືກັບ Leica ອີກຄັ້ງເຮັດໃຫ້ພາບທີ່ໄດ້ຈາກກ້ອງຖ່າຍມີຄຸນະພາບສູງ.

ນອກຈາກນັ້ນ ຍັງມາກັບເຊັນເຊີສະແກນລາຍນິ້ວມືທີ່ຮ່ວມກັບປຸ່ມ ເປີດ-ປິດເຄື່ອງ, ຮອງຮັບລະບົບຄວາປອດໄພ ແລະ ສະດວກສະບາຍ.

ໃນງານ MWC 2019, Huawei ນອກຈາກຈະເປີດໂຕສິນຄ້າ Series ໃໝ່, ຍັງລວມມີການອັບເດດລຸ້ນ HUAWEI MateBook X Pro, Notebook Psc ລຸ້ນໃໝ່ຄື Huawei Matebook 13 ແລະ Huawei Matebook 14, ເຄື່ອງປ່ອຍສັນຍານ HUAWEI 5G CPE pro. ການເປີດໂຕຂອງລະບົບ 5G ນີ້, Huawei ຮັບປະກັນເລີຍວ່າຈະສົ່ງມອບປະສົບການໃໝ່ໆລ້ຳສະໄໝທີ່ບໍ່ເຄີຍມີມາກ່ອນໃຫ້ລູກຄ້າໄດ້ສຳຜັດກັນແນ່ນອນ.

Huawei Mate X ມາກັບສີສັນໃໝ່ Interstellar Blue ເປີດໂຕລາຄາຢູ່ທີ່ 2,299 ຢູໂຣ, ທາງ Huawei ຈະເລີ່ມວາງຈຳໜ່າຍໃນຊ່ວງກາງປີ 2019 ນີ້, ເຊິ່ງໃນປະເທດລາວຈະມີການນຳເຂົ້າມາຈຳໜ່າຍບໍ່ນັ້ນໃຫ້ທຸກຄົນຕິດຕາມນຳກັນໄດ້ທີ່ເພຈທາງການຂອງຫົວເຫວີຍລາວ: HUWEI MOBILE (LA).

ສາມາດຮັບຊົມໂຕເຄື່ອງເພີ່ມເຕີມຂອງ Huawei Mate X ໄດ້ທີ່ລິ້ງ: https://www.youtube.com/watch?v=vRxLGvH1EnE&feature=youtu.be

 

 

 

 

ລາຍການທີ່ກ່ຽວຂ້ອງ

ວີດີໂອແນະນໍາ